لمّا قام الديك يأذّن
قفلت عيونها وغمضّت
وكأنه يعني الرمش نام
وبشوق وحُب اتنهّدِت
قالت خلاص سِكت الكلام
حسيت ساعتها
إن لحظات الهيام
بتفوت قوام ..

أنا كنت حاسس
إني في حضرة ملاك
اللمسه مش لمسة بشر
قولوا حرير
أو ريش نعام !
أمّا العبير
كان شيء جميل
يشفي العليل
لو بس قرب م القوام
والثغر من طيب الكلام
مفارقش لحظه الإبتسام

لأ مش كلام !
كانت بتهمس
همس أحلى من الكلام
وكأنها بدر السما ليلة التمام
كُنا في حالة إنسجام
طايرين لفوق عند السما
متوسدين حتة غمام ،
حسيت كأني
عمري ما عرفت الغرام

طول عمري وانا ليلي طويل
معرفش ليه الليله دي
فاتت قوام !
معرفش ليه الديك صحي !
كان نفسي بس الليله ديا
الديك ينام .......
ــــــــــــــــــــ
علي فرج