فاكرولا ناسي ..... للشاعر حمدي عبدالقادر
فاكرولا ناسي
من نور الشمس بزرع حبوب العمل
ومن ضوء القمر بنسج خيوط الأمل
ومن صنوف البشر بختار أحبابي
وأنا الجريح اللي ماترك الحزن بابي
وليه بنكدب والكدب بقى عنوان
وعشان تعيش لازم تبقى بهلوان
هو إيه اللي حصل ليه الطيبة بقت خيبة
والصدق بقى في زماننا أكبر مصيبة
وعشان توصل لازم تبقى حاوي وجبان
فاكر ياصحبي أيام زمان وخيرزمان
فاكر لم الكبير كان له احترام وهيبة
وكلامه يمشي على كل العيلة
فاكر لمتنا ف غدوتنا ف بيت العيلة
والكل الفرحة من عينه بتطل طلة جميلة
وكانت لقمة تجمعنا وعمر الأحزان متجرحنا
ونجري ف الدنيا ونرجع لحضن بتنا مطرحنا
فاكر عمك وخالك طب فاكر أهلك وناسك
طب فاكر يوم ماكنت بتأكل من فاسك
فاكر جمال الزرعة وخضرة النبات
طب فاكر طهر الولاد وعفة البنات
فاكر يوم ما المدرس كان قدوة
وبنضرب له تعظيم سلام
وبقسوة الحياة ضيعوا كرامته
وأهانوه بمسرحية وأفلام
فاكر أم كلثوم وعبد الحليم
ولاده مينفعش في زمن اللئام
فاكر لم كنا بنشجع لعبة في غنوة
فاكر الخطيب وأدبه ولعبته الحلوة
ليه بقى تعصبنا تعصب عيال
لانافع تالتة يمين ولا تالته شمال
فاكر لم كنا شعب واحد
الوطن للجميع والرب واحد
إيه اللي جري وفرق شملنا
وجمع علينا الهموم وملا بها قلبنا
انسى كل اللي فات وهات اللوم علي أنا
يا صاحبي ياغالي همك هو همي أنا
فاكر ولاناسي ولا كترت عليك المأسي أنا
للشاعر حمدي عبدالقادر
0 التعليقات